عشان عمرو مصطفى مايزعلش

طبعا أحداث التحرير الأخيرة بتفكرنا كلّنا بـ -حدث ليس ببعيد - ثورة 25 يناير

بصرف النظر عن دهشة الكتير مننا يعنى أيه ثورة كل 10 شهور !! و الرد البسيط و المنطقى على الموضوع ده هو إننا نفسنا قصير

أو ماعندناش نفس من أصله , الناس اللى فضلت تلبسنا العمة و تقوللنا ثورة 25 يناير حدث عالمى و بيعكس صورة متحضرة عن مصر

ماتبوظوش اللى عملتوه و مصر مش زى تونس و ليبيا , فعلاً احنا مش زيهم لأنهم عملوا اللى عايزينه من ثورتهم و قطعوا رأس الأفعى بمعنى أصح.

تعالوا بقى نعمل مقارنة بسيطة بين الكلام اللى انتشر أيام ثورة يناير و الأيام دى اللى المفروض انها امتداد للثورة مع بعض اختلافات بسيطة .

أولاً رجعنا تانى لقصة القلة المندسه و مثيرى الشغب و الفضائيين و الكائنات الأسطورية اللى بتعمل مشاكل فى التحرير

ثانياً تصريحات الحكومة بضبط النفس و انهم بسم الله ما شاء الله عندهم أعصاب من حديد و ان دى محنة و هاتعدى

ثالثاً وزير الداخلية الأكثر من رائع اللى اللى منزل الشرطة بكامل قوتها تضرب فى مدنيين عزل !! بس الفرق ان العيسوى هايقول "احنا معندناش ضباط فى الداخلية"

رابعاً الحاكم للبلاد اسم الله عليه مش فاضى يعلق على اللى بيحصل لأنه مشغول فى حاجة أهم من البلد -نفسى أعرف أيه هيا!! -

و أخيراً يبدو اننا سنواجه فى الأيام القليلة القادمة إن شاء الله

1- شائعات العملة الصعبة المتوفرة بكثرة فى التحرير

2- وجبات الكنتاكى الحجم الجديد اللى بتكفى ملايين من المتظاهرين

3- انفلات امنى و إعادة فيلم الهروب

4- لجان شعبية يطلع فيها عين أم أى ظابط

5- الأستخدام المكثف لمقولة " منكم لله خربتوا البلد" !!

6- خطاب تنحى متسجل على شريط فيديو قديم كان عليه فيلم اللمبى !!

و مش عايزين ننسى اللى قالوا المخلوع -حسنى- لما يمشى أمريكا و اسرائيل هيحتلًونا و ده طبعا كان واضح جدا من نظراتهم لينا اللى كلها نظرات مريبة و مقلقة فى الفترة الاخيرة لكنهم ماعرفوش يحتلونا مثلا علشان الانفلات الأمنى اللى بتعانى منه مصر و ده سبب خوف أمريكا و أسرائيل على معدّاتهم العسكرية و الجنود !.

و نلاقى أغنية شهداء 25 نوفمبر ماتوا فى أحداث نوفمبر من الفنان حمادة هلال, و يطلع الفنان المبدع عمرو مصطفى يقول كلام تخوين عن بعض الحركات السياسية و الأئتلافات و يقول تقصد أيه بالكتلة المصرية !؟! عايز تشتم شعب مصر و تقول انهم زى القرف !!.

و قطونيل هيا السبب فى الثورة, و طبعاً التاريخ مش صعب على فنان زى عمرو مصطفى أنه يشوفله صرفة لأنه فيه نفس الهارمونى.

يا ريت 25/11 كلّنا ننزل نحقق انتصار جديد ضد الظلم و الاستهتار بحياة الناس .