ملاحظ انك عايش فى فيلم كئيب من النوع الرخيص ؟؟ دايماً بتحب تلعب دور الضحية فى أحداث حياتك اليومية, و يوم ما بيحصل تغيير طفيف فى الدور ده بتلاقى انك بتجسد دور الضحية اللى عادت للإنتقام بس برضو هى فى الأصل ضحية !!.
انتا ليه دايماً بتستنى يطلع منك رد الفعل ؟ ليه ماتبدأش الفعل و تستنى تشوف رد الفعل من اللى حواليك ؟
خلاص بقت مملة أوى انك عايش دور الضحية.
ضحية فى الشارع , ضحية فى البيت, ضحية فى الجامعة , ضحية مع أصحابك , ضحية حتى و انتا مع نفسك !! لأ ده انتا فعلاً مش طبيعى.
حاول تكون إيجابى و جسد أى شخصية تانية يكون ليها نمط مختلف إعمل أى حاجة تانية تبينلك انك انتا اللى مسيطر على الأمور.
إبدأ من النهاردة ,من دلوقتى ! خلى الفيلم اللى انتا عايش فيه ده يخلص فى نصه و إعمل حاجة عليها القيمة و مفيدة لأن فى حاجات كتييييير جداً ممكن تعملها تبقى فعالة و ليها دور مؤثر.
بتقول أيه ؟؟ مافيش حاجة مفيدة ممكن تتعمل !؟لا و الله ده فى حاجات كتير جداً.
طب أقولّك أمثلة ؟؟ لأ مش هاقوللك.
خليك إيجابى و فكر انتا.
